کندز ولایت کې ۸۰ جریبه امارتي ځمکه استرداد شوه
د کندز ولایت د ځمکو د غصب د مخنیوي د تخنیکي هیئت ناسته د ۱۴۴۵ هجري قمري کال د محرم الحرام د میاشتې په ۱۴ نېټه د دوشنبې په ورځ د دغه هیئت د رئیس او غړو په حضور سره جوړه شوه او د حضرت امام صاحب ولسوالۍ د خواجه تاو ساحې دوسیه په کې ارزونې او بررسۍ لاندې ونیول شوه.
دغه هیئت د یادې ساحې ۸۰ جریبه امارتي ځمکه استرداد کړه او د هغې د اجارې ورکولو پړاونو تېرولو لارښوونه یې صادر کړه.
دغه راز په دغې ناسته کې د ۱۲۰ جریبه ځمکې په اړه د حلقه کول ساحې دوسیه ارزونې او بررسۍ لاندې ونیول شوه چې په پایله کې یاده ځمکه امارتي تثبیت شوه او د هغې د استرداد په برخه کې لازمې لارښوونې وشوې.
د تخنیکي هیئت غړو د یاد ولایت له والي سره هم د همغږۍ ناسته جوړه کړه او د تېرې یوې میاشت په ترڅ کې د خپلو فعالیتونو راپور وړاندې کړ او خپل ستونزې او ننګونې له نوموړي سره شریکې کړې ترڅو د هغو د حل په برخه کې همکاري وکړي.
د کندز ولایت والي د تخنیکي هیئت کړنې وستایلې او د تخنیکي هیئت له غړو سره يې د هر ډول همکارۍ ژمنه وکړه.
