پکتیکا ولایت کې د ځمکې د غصب د مخنیوي د کمېټې دوه یمه ناسته جوړه شوه
پکتیکا ولایت کې د ځمکې د غصب د مخنیوي د کمېټې دوه یمه ناسته د ربیع الثاني میاشت په ۲۴ نېټه د شنبې په ورځ د کرنې رییس په مشرۍ او د عدلیې رییس، د امارت د قضایاو امر او ددغې کمېټې د نورو غړو په ګډون ددغه ولایت د کرنې ریاست په مقر کې جوړه شوه.
په دغې ناسته کې د پکتیکا د کرنې رییس مولوي محمد اسماعیل شکیب ددغه ولایت په مرکز د ښرنې ښار کې د یو شمېر خلکو له لوري د امارتي ځمکو د غصب په اړه معلومات وړاندې کړل او تصمیم ونیول شو چې په دغې اړه د یکشنبې له ورځې عملي کار پیل شي.
دغه راز په یاده ناسته کې د تخنیکې کمېټې نورو غړو ځیني موضوعات شریک کړل او پای کې یو تخنیکي او مسلکي ټیم تعیین شو چې ټولې غصب شوې امارتې ځمکې کروکي او تثبیت کړي.
دغه راز د ولسوالیو په کچه د اړوندو ریاستونو د مدیرانو په ګډون یو ټیم تشکیل شو چې غصب شوې ځمکې تشخیص او تخنیکي کمېټې له پاره کار ساده کړي.
د یادولو وړه ده چې، د ځمکو د غصب د مخنیوي او د غصب شوو ځمکو د تشخیص او تثبیت تخنیکي کمېټې د ځمکو د غصب د مخنیوي او د غصب شوو ځمکو د استرداد کمېسیون په چوکاټ کې د ولایتونو په کچه جوړې شوي دي. ددغو کمېټو د جوړیدو موخه، د غصب شوو ځمکو تشخیص، د سندونو راټولول او یاد کمېسیون ته د ولایتونو د ځمکو د غصب قضیو وړاندې کول د پریکړو د تطبیق د کمېسیون له پاره دي.
