پکتیا کې د منصوري ۲۰۳ قول اردو غصب شوي ملکیتونه بررسي کیږي
د پکتیا ولایت د عدلیې رئیس مولوي محمد رئیس محمدي او له هغه سره مل پلاوي په یاد ولایت کې د منصوري ۲۰۳ قول اردو له مسؤولینو سره وکتل او د یادې قول اردو د غصب شویو ملکیتونو د دوسیو د بررسۍ په اړه یې له هغوی سره خبرې وکړې.
په دې کتنه کې چې د شعبان د میاشتې په ۲۰ نېټه د شنبې په ورځ ترسره شوه، د عدلیې رئیس د منصوري قول اردو د غصب شویو ملکیتونو د دوسیو د رسیدګۍ په اړه د یادې قول اردو مرستیال ته معلومات وړاندې کړل او ټینګار یې وکړ چې امارتي ادارې مکلفې دي چې د امارتي ملکیتونو د دفاع په موخه د سندونو برابرولو په برخه کې د عدلیې ریاست د امارت قضایاوو ادارې سره همکاري وکړي.
دغه راز د عدلیې رئیس او ورسره مل پلاوي د منصوري قول اردو د غصب شویو ملکیتونو اړوند ۴ دوسیو ته د لاښې رسیدګۍ په موخه د سندونو او معلوماتو وړاندې کولو په برخه کې يې د مسوؤلینو د همکارۍ غوښتنه وکړه.
له بلې خوا، د یادې قول اردو مرستیال هم د عدلیې ریاست د مسؤولینو په قدردانۍ سره، ډاډ ورکړ چې پورته مواردو کې له یاد ریاست سره هر ډول همکارۍ ته چمتو دی.
