په کابل کې د غیرقانوني فعالیت له امله د معاملاتو لارښوونې د ۱۹۳ دفترونو تړل کېدل
د عدلیې وزارت د انسجام عمومي رياست د معاملاتو لارښوونې او د عريضه ليکونکو د چارو رياست نظارتي پلاوي، د روان کال په لیندۍ میاشت کې د کابل په ښار کې د معاملاتو لارښوونې ۲۳۴ دفترونه نظارت او بررسي كړي دي.
د دغه نظارت په ترڅ کې، د معاملاتو لارښوونې ۱۹۳ دفترونه د غير قانوني فعاليتونو له امله تړل شوي او د پاتې نورو دفترونو په فعاليتونو کې موجودې ستونزې هم مشخصې او د حل په هکله یې لازمې توصیې وړاندې شوي دي.
همدارنګه، د معاملاتو لارښوونې او د عريضه ليکونکو د چارو رياست د تېرې مياشتې په اوږدو کې د معاملاتو لارښوونې د فعالیت د جواز غوښتونکو لپاره ۳۹ نوي جوازونه ويشلي او ۷۰ نور جوازونه یې تمديد کړي دي.
همداراز، د عریضه لیکنې په برخه کې ۱۳ تنو لپاره نوي جوازونه ویشل شوي او د ۳۹ تنو نورو جوازونه تمديد شوي دي.
د عدلیې وزارت د انسجام عمومي رياست په مرکز او ولایتي آمریتونه یې په ولایتونو کې په منظم ډول اړوندې برخې نظارت او بررسي کوي تر څو له غیر قانوني فعاليتونو څخه مخنیوی وکړي.
