په کابل ښار کې ۳۲ خیریه بنسټونه او اتحادیې تر نظارت او بررسۍ لاندې ونیول شوې
د عدليې وزارت د ټولنو او ټولنيزو بنسټونو رياست نظارتي پلاوي، د تېرې یوې مياشتې په ترڅ کې په کابل ښار کې ۱۵ اتحادیې او ۱۷ خیریه بنسټونه نظارت او بررسي کړل.
ياد شوي پلاوي په دې بررسۍ سره، د ۶ خیریه بنسټونه او اتحادیو چې د جوازونو د اعتبار مودې یې پای ته رسیدلې وې او په ناقانونه توګه يې فعالیت درلود، وپېژندل او د هغو د ناقانونه فعالیت مخنيوی او دفترونه یې مهرلاک کړل.
هیئت د یادو اتحادیو او خیریه بنسټونو متصدیانو ته توصیه وکړه چې د افغانستان اسلامي امارت د اصولو او پاليسو مطابق خپل فعالیتونه ترسره کړي.
همداراز له هغوی څخه وغوښتل شول چې د خپلو فعالیتونو راپور په خپل وخت د ټولنو او ټولنیزو بنسټونو چارو ریاست ته وړاندې کړي.
د عدليې وزارت د ټولنو او ټولنيزو بنسټونو د چارو رياست نظارتي پلاوی په دوامداره توګه د اتحادیو او خیریه بنسټونو له فعالیت څخه بررسي او نظارت ترسره کوي تر څو د ناقانونه فعالیتونو مخنیوی وکړي.
