په کابل ښار کې د خیریه بنسټونو او اتحادیو د ۴۲ دفترونو له فعالیتونو څخه نظارت ترسره شو
د عدليې وزارت د ټولنو او ټولنيزو بنسټونو رياست نظارتي پلاوي، د روان کال ثور(غويي) مياشتې په ترڅ کې په کابل ښار کې د ۱۶ اتحادیو او ۲۶ خیریه بنسټونو فعاليتونه نظارت او بررسي کړي دي.
مؤظف پلاوي په دې نظارت او بررسۍ سره، د یوې اتحادیې او د اوو خیریه بنسټونو دفترونه چې په ناقانونه توګه يې فعالیتونه درلودل، مهرلاک کړل.
هیئت د یادو اتحادیو او خیریه بنسټونو نورو متصدیانو ته توصیه وکړه چې د افغانستان اسلامي امارت د اصولو او پاليسیو مطابق خپل فعالیتونه ترسره کړي
همداراز نظارتي پلاوي له هغوی څخه وغوښتل چې د خپلو فعاليتونو راپور په وخت د عدلیې وزارت د ټولنو او ټولنیزو بنسټونو چارو له رياست سره شريک کړي.
د عدليې وزارت د ټولنو او ټولنيزو بنسټونو د چارو رياست نظارتي پلاوی په دوامداره توګه د اتحادیو او خیریه بنسټونو له فعالیت څخه بررسي او نظارت ترسره کوي تر څو د ناقانونه فعالیتونو مخنیوی وکړي.
