په پکتيکا ولایت کې د معاملاتو لارښوونې له یو شمېر دفترونو څخه نظارت ترسره شو
د پکتيکا ولایت د عدلیې رياست نظارتي پلاوي د شعبان د مياشتې په ۲۹ مه نېټه د سهشنبې په ورځ د دغه ولایت د مرکز، په ښرنې بازار کې د معاملاتو لارښوونې له یو شمېر دفترونو څخه نظارت ترسره کړ او د هغو فعاليتونه یې بررسي کړل.
د یاد نظارت په ترڅ کې د دغو دفترونو د فعاليت جوازونه، رسمي سټې، لوحې او یو شمېر نور اړين اسناد بررسي شول.
نظارتي پلاوي د یادو دفترونو متصديانو ته توصيه وکړه چې خپل ټول معاملات رسمي سټو کې ترسره کړي او د جعلي سټو څخه ډډه وکړي.
نظارتي پلاوي د یادو دفترونو په فعاليتونو کې یو شمېر ستونزې او نيمګړتياوې مشخصې کړې او د ستونزو د لرې کولو او د کاري چارو ښه پر مخ وړلو په موخه یې د یادو دفترونو متصديانو ته لازمې توصیې وکړې.
د پکتيکا د عدلیې رياست په دوامداره توګه له اړوندو برخو څخه نظارت ترسره کوي ترڅو د غيرقانوني فعاليتونو مخنيوی وشي.
