په پروان ولایت کې د کورونو د کرایې د کنټرول په موخه ګډه کمېټه جوړه شوه
په پروان ولایت کې د کورونو د کرایې د کنټرول لپاره د ګډې کمیټې رامنځته کولو په موخه د همغږۍ ناسته د ربیع الاول د مياشتې په ۲۴مه نېټه د چهارشنبې په ورځ د پروان ولایت د عدلیې رئیس مولوي ګل رسول نصرت په مشرۍ او د یو شمېر امارتي ادارو د استازو په ګډون د عدلیې رياست په مقر کې جوړه شوه.
په دې ناسته کې د همدې موخې لپاره د پروان ولایت د مقام، ښاروالۍ، استخباراتو، د حکمونو او فرمانونو د تعقيب او نظارت، د کور او ښار جوړولو، د کرنې، اوبو لګولو او مالدارۍ رياستونو د استازو په ګډون ګډه کمېټه جوړه شوه.
په دې ناسته کې د کورونو د کرایو د زياتوالي او د هغو د کنټرول د څرنګوالي په اړه هم بحث وشو او ټينګار وشو چې په دې برخه کې باید جدي نظارت ترسره شي.
د پروان ولایت، عدلیې رئيس په دې ناسته کې ټينګار وکړ چې یاده کمېټه مکلفه ده چې د پروان ولایت په کچه دا اجازه ورنه کړي چې د کورنو کرایه د ۱۴۰۳ کال په پرتله له لس سلنې لوړه شي.
د کورونو د کرایې د کنټرول ګډه کمېټه په مرکز کې د عدلیې وزارت په مشرۍ او په ولایتونو کې د عدلیې ریاستونو په مشرۍ په جدي ډول د کورونو د کرایې له قراردادونو څخه نظارت ترسره کوي او د کرایې د زیاتوالي یا د غیر رسمي قرارداد د مشاهدې په صورت کې به له سرغړونکو اشخاصو سره جدي چلند وکړي.
