په هرات ولایت کې د معاملاتو لارښوونې ۷ دفترونه د غير قانوني فعاليت له امله وتړل شول
د هرات ولایت د عدلیې رياست نظارتي پلاوي د رجب المرجب د مياشتې په ۲۵مه نېټه د پنجشنبې په ورځ، په هرات ښار کې د معاملاتو لارښوونې له ۵۳ دفترونو څخه نظارت ترسره کړ او د هغو فعاليتونه یې بررسي کړل.
د یاد نظارت په ترڅ کې د دغو دفترونو د فعاليت جوازونه، رسمي سټې، لوحې او یو شمېر نور اړين اسناد بررسي شول چې په ترڅ کې یې د معاملاتو لارښوونې ۷ دفترونه د غیرقانوني فعاليت له امله وتړل شول.
نظارتي پلاوي د معاملاتو لارښوونې د نورو دفترونو په فعاليتونو کې یو شمېر ستونزې او نيمګړتياوې هم مشخصې کړې او د ستونزو د لرې کولو او د کاري چارو ښه پر مخ وړلو په موخه یې د یادو دفترونو متصديانو ته لازمې توصیې وکړې.
د هرات د عدلیې رياست په دوامداره توګه له اړوندو برخو څخه نظارت ترسره کوي ترڅو د غيرقانوني فعاليتونو مخنيوی وشي.
