په غزني ولایت کې د کورونو د کرایې کنټرول په موخه د ګډې کمېټې ناسته جوړه شوه
په غزني ولایت کې د کورونو د کرایې کنټرول ګډې کمېټې د ربیع الاول د مياشتې په ۲۷ مه نېټه د شنبې په ورځ، د یاد ولایت د عدلیې رئيس مولوي مطیع الحق عثمان په مشرۍ او د اړوندو ادارو د استازو په ګډون یوه ناسته جوړه کړه.
په دې ناسته کې د کورونو د کرایې کنټرول د څرنګوالي په اړه بحث وشو او ټينګار وشو چې دا پروسه باید د غزني ولایت په ټولو ناحيو کې په جدي توګه دوام ولري.
همداراز په دې ناسته کې پرېکړه وشوه چې د کورونو د کرایې څخه شکایت کوونکي کولای شي اړوندو امنيتي حوزو کې شکايت وړاندې کړي.
دغه راز ټينګار وشو چې نظارتي ټيمونه دې د ګذر وکيلانو او د معاملاتو لارښوونې د استازو په ملتیا، په ساحو کې له کرایه نيوونکو سره مستقيماً خبرې وکړي او د کورنو کرایې په اړه دې پوښتنې وکړي او بیا دې له سټې سره پرتله کړي او د تخلف په صورت کې دې قانوني چلند ترسره شي.
د کورونو د کرایې کنټرول ګډه کمېټه په مرکز کې د عدلیې وزارت په مشرۍ او په ولایتونو کې د عدلیې ریاستونو په مشرۍ په جدي ډول د کورونو د کرایې له قراردادونو څخه نظارت ترسره کوي او د کرایې د زیاتوالي یا د غیر رسمي قرارداد د مشاهدې په صورت کې به له سرغړونکو اشخاصو سره جدي چلند وکړي.
