په غزني ولایت کې د سرو زرو ۸ پلورنځي وتړل شول
د غزني ولایت د عدلیې ریاست په مشرۍ ګډ پلاوي د رجبالمرجب میاشتې په ۱۶مه نېټه د سهشنبې په ورځ، د امر بالمعروف او نهی عن المنکر، د امنیې قوماندانۍ او د زرګرانو اتحادیې د استازو په ګډون د غزني ښار په کلاهسبز سیمه کې د سرو زرو له ۱۵ پلورنځیو څخه نظارت ترسره کړ.
ګډ پلاوي د یاد نظارت پر مهال د فعالیت جوازونه، د سرو زرو عیار، نرخونه او یو شمېر نور اړین موارد وڅېړل چې په ترڅ کې یې د سرو زرو ۸ پلورنځي د یو شمېر غیرقانوني فعالیتونو له امله وتړل شول.
همدارنګه، موظف پلاوي د سرو زرو د نورو پلورنځیو په کاري چارو کې یو شمېر ستونزې او نیمګړتیاوې تشخیص کړې، چې د لرې کولو په موخه یې اړوندو مسؤولینو ته لازمې توصیې وکړې.
د عدلیې وزارت په مرکز او د عدلیې ریاستونه په ولایتونو کې په دوامداره توګه له اړوندو برخو څخه نظارت ترسره کوي، تر څو د غیرقانوني فعالیتونو مخه ونیول شي.
