په غزني ولایت د معاملاتو لارښوونې دوه دفترونه د غیر قانوني فعاليت له امله وتړل شول
د غزني ولایت د عدلیې ریاست نظارتي پلاوي، په تېره یوه اوونۍ کې د کابل ـ قندهار لویې لارې په اوږدو، د پشتونآباد سیمې د موټر پلورنځیو او د معاملاتو لارښوونې له یو شمېر دفترونو څخه نظارت ترسره کړ.
په دغه نظارت کې د یادو دفترونو قانوني اسناد، د فعالیت جوازونه، د ثبت کتابونه، رسمي سټې او یو شمېر نور اړین موارد وکتل شول، چې په ترڅ کې یې دوه دفترونه د غیر قانوني فعالیت له امله وتړل شول.
همدارنګه د پاتې نورو دفترونو په فعاليتونو کې يو شمېر ستونزې مشخصې شوې چې نظارتي پلاوي د یادو ستونزو د حل کولو او چارو ښه پرمخ وړلو په موخه لازمې توصيې وکړې.
همدارنګه د دغه نظارت په ترڅ کې د یادو دفترونو متصديانو هم خپلې موجودې ستونزې شريکې کړې چې د حل په برخه کې ورته ډاډ ورکړل شو.
د عدلیې وزارت په مرکز کابل او عدلیې رياستونو په ولایتو کې له اړوندو برخو څخه په دوامدراه توګه نظارت ترسره کوي تر څو د غير قانوني کړنو مخنيوی وشي او خلکو ته لا زياتې اسانتياوې برابرې شي.
