په سرپل ولایت کې ۴ جریبه ځمکه امارتي تثبیت شوه
د سرپل ولایت د ځمکو د غصب د مخنیوي د تخنیکي هیئت ناسته د صفرالمظفر د میاشتې په ۱۹ نېټې د سه شنبې په ورځ د دغه هیئت د رئیس او غړو په حضور سره جوړه شوه او د ځمکو د غصب اړوند یو شمېر دوسیې په کې بحث او بررسۍ لاندې ونیول شوې او په دغې برخه کې لازم تصمیمونه ونیول شول.
په دغې ناسته کې، د دغه ولایت د مرکز په امام جعفر کلي کې د حج او اوقافو ریاست او د دغه ولایت د یو تن اوسیدونکي ترمنځ د ۴ جریبه ځمکې دوسیه بررسي شوه او امارتي تثبیت شوه. اړوندو مسؤلینو ته هم لارښوونه وشوه چې د هغې د استرداد پړاونه بشپړ کړي او یاده ځمکه د ځمکو په بانکې کې ثبت کړي.
په همدې توګه په ایګزک کلي کې د ۳۱ جریبه ۱۷ بسوې او ۶ بسواسې اوبه درلودونکې ځمکه بررسۍ لاندې نیول شوې او د هغې سندونه بشپړ شوي او په همدې توګه د دغه ولایت دوو تنو اوسیدونکو ترمنځ تر دعوا لاندې ۶ جریبه او ۱۰ بسوې ځمکه شخصي څړځای تثبیت شو او لارښوونه وشوه چې د هغې دوسیه د امارت د قضایاوو آمریت ته واستول شي.