په تېره یوه میاشت کې څه باندې ۳۵ زرو تنو ته حقوقي پوهاوی وړاندې کېدل
د عدلیې وزارت د حقوقي مرستو رياست په مرکز کې او ولایتي آمریتونو يې د روان کال د ربیع الاول د میاشتې په اوږدو کې، د کابو ۲۰۰ برنامو په جوړولو سره ۳۵ زره او ۵۲۶ تنو هېوادوالو ته حقوقي پوهاوی وړاندې کړی.
دا برنامې د مرکز په شمول د هېواد په ۲۷ ولایتونو کې جوړې شوي او په ترڅ کې یې ۱۱ زره او ۳۶۰ تنو په کابل، ۳ زره او ۹۱۸ تنو په بلخ، ۳ زره او ۲۶۳ تنو په ارزګان او پاتي نور په بېلابېلو ولایتونو کې له دغو برنامو څخه برخمن شوي دي.
په دغو برنامو کې د عدلیې وزارت د پېژندنې، د اسلامي شریعت د حکمونو په رڼا کې د اولادونو د روزنې، د هېوادوالو حقوقو او مکلفیتونو او د ورته نورو مهمو موضوعاتو په اړه پوهاوی وړاندې شوی.
دغه راز په دغو برنامو کې د حقوقي مرستې د څانګې مسلکي غړو په مرکز او ولایتونو کې د ګډونوالو پوښتنو ته ځوابونه وړاندې کړي او د بېلابېلو موضوعاتو په اړه یې هغوی ته حقوقي مشورې وړاندې کړي.
د عدلیې وزارت، د مرکز په ګډون د هېواد په ټولو ولایتونو کې د حقوقي پوهاوي ورکولو برنامې جوړوي او موخه یې دا ده چې خلک د خپلو حقوقو، وجایبو او مکلفیتونو په اړه پوهاوی ترلاسه کړي.
