په تېره یوه میاشت کې څه باندې ۳۳ زره کسانو ته حقوقي پوهاوی ورکړل شوی
د عدلیې وزارت د حقوقي مرستو رياست په مرکز او ولایتي آمریتونو يې په ولایتونو کې د روان کال د شوال میاشتې په ترڅ کې، د ۱۴۶برنامو په جوړولو سره ۳۳ زره او ۱۴۰ تنو هېوادوالو ته حقوقي پوهاوی وړاندې کړی.
یادې برنامې د مرکز په شمول د هېواد په ۲۶ ولایتونو کې ترسره شوې، چې له ډلې یې ۶ زره او ۴۵ تنه په غزني، ۵ زره او ۶۱۳ تنه په بلخ، ۴ زره او ۶۸۵ تنه په پکتیکا او پاتې نور په بېلابېلو نورو ولایتونو کې له دغو برنامو څخه برخمن شوي دي.
په دې پوهاوي برنامو کې ګډونوالو ته شکمن او تورن د حقوقو، د اسلامي شریعت د حکمونو په رڼا کې د اولادونو د روزنې، د اسلامي شريعت له نظره پر ماشومانو د مور او پلار د حقوقو، نشه يي توکي او په اسلامي شريعت کې د هغو احکام، غصب او د ورته نورو مهمو موضوعاتو په اړه پوهاوی ورکړل شوی.
دغه راز په دغو برنامو کې د حقوقي مرستې د څانګې مسلکي غړو په مرکز او ولایتونو کې د ګډونوالو پوښتنو ته ځوابونه ورکړي او د بېلابېلو موضوعاتو په اړه یې هغوی ته حقوقي مشورې وړاندې کړي.
د عدلیې وزارت، د مرکز په ګډون د هېواد په ټولو ولایتونو کې د حقوقي پوهاوي ورکولو برنامې جوړوي او موخه یې دا ده چې خلک د خپلو حقوقو، وجایبو او مکلفیتونو په اړه پوهاوی ترلاسه کړي.
