په بدخشان ولایت کې د ۱۴۳۰ جریبه ځمکې بررسي کېدل
د بدخشان ولایت د ځمکو له غصب د مخنيوي تخنيکي هيئت ناسته د شعبان د مياشتې په ۵ مه نېټه د سهشنبې په ورځ، د یاد هيئت د رئيس او غړو په ګډون جوړه شوه.
د تخنيکي هيئت په دې ناسته کې د دغه ولایت د مرکز، فیض آباد ښار اړوند د اوومې ناحيې د خمچان دښتې په ساحه کې د يوزرو څلور سوه دېرش (۱۴۳۰) جریبه ځمکې په اړه بحث او خبرې وشوې.
تخنيکي هيئت پرېکړه وکړه، چې د یادې ځمکې په هکله املاکي څېړنې ترسره شي او دوسیه یې تر بشپړېدو وروسته، د وروستۍ پرېکړې په موخه مرکزي کميسيون ته واستول شي.
همدارنګه په دې ناسته کې د ځمکو د غصب اړوند یو شمېر نورې دوسيې هم تر بررسۍ لاندې ونيول شوې او په اړه یې لازم تصامیم ونیول شول.
