پروان ولایت کې څه دپاسه ۱۳۴ جریبه ځمکه تصفیه شوه
د پروان او بامیان ولایتونو د ځمکې د غصب د مخنیوي د تخنیکي هیئتونو ناستې ددغو هیئتونو د رییسانو او غړو په حضور سره جوړې شوې او د پروان ولایت ځینې سیمې تصفیه او تثبیت شوې.
د پروان ولایت تخنیکي هیئت خپل د ناستې له جوړولو څخه وروسته د بګرام ولسوالۍ خم کلان ساحې ته ولاړ او د څینزي قوم د ځمکو د ساحو حدود او مساحت، د قطعې ګڼه، د غاصب شهرت، د ودانیو ډول او اوسنۍ بیه مشخصه کړه.
یاد هیئت ددغې لیدنې په لړ کې کرنیزې ځمکې او کورونه جریب کړل او ۱۳۴.۳۴۷ جریبه ځمکه او ۱۰۰ کورونه یې تصفیه کړل.
دغه راز یاد هیئت څینزیو قوم ته دوه ډوله استعلامونه وویشل ترڅو د یادې ځمکې سندونه حاضر کړي او هم د ځمکې بیه مشخصه کړي.
په همدې حال کې، د بامیان ولایت د تخنیکي هیئت په ناسته کې د ملا غلام ښارګوټي د مالک د غوښتلو او ددغه ښارګوټي د سندونو په اړه له نوموړي او اړوندو ادارو څخه څېړنې او دغه راز د یاد ښارګوټي څخه د لیدنې پریکړه وشوه.
یاد شوي هیئت ټولګټو ریاست ته د یو شخص عریضه واستوله او ځینو صعب العبورو ولسوالیو ته د نامساعدې هوا له کبله سفر ځنډولی.
