د 6 دولتي ادارو کارکوونکو لپاره د تقنیني سندونو د تشریح برنامې دوه یم پړاو جوړ شو
د عدليې وزارت د ۶ وزارتونو او د دولتي ادارو د حقوقي برخو د کارکوونکو لپاره د تقنیني سندونو د تشریح زده کړه ییزې برنامې دوه یم پړاو جوړ کړ.
دغه برنامه د روان کال د تلې میاشتې په ۳۰ نېټه د چهار شنبې په ورځ د عدليې وزارت د قانون جوړونې او علمي- حقوقي څېړنو دچارو د انستیتیوت له لوري جوړه شوه او په هغې کې د جمهوري ریاست د چارو د ادارې د لوی ریاست، د ملکي خدمتونو او د اداري اصلاحاتو خپلواک کمېسیون، د اقتصاد ، د سرحدونو قومونو او قبایلو چارو ، د کرنې او مالدارۍ او د صنعتو او سوداګرۍ وزارتونو په ګډون د وزارتونو او ادارو د حقوقي برخو ۳۵ کارکوونکو برخه واخیسته.
په دې زده کړییزه برنامه کې د تقنیني سندونو د پړاوونو د تیرولو قانون او د اداري اجرااآتو قانون د عدليې وزارت د قانون جوړونې او د علمي –حقوقي چارو انستیتیوت د کارپوهانو له لوري تشریح شول.
د تقنیني سندونو د لومړنۍ طرحې د تسوید او برابرولو بهیر او د دغو سندونو د متعددو تعدیلونو د مخنیوي لپاره د رعایتولو وړ د معیارونو په باره کې هم په دې برنامه کې خبرې وشوې.
ټاکل شوې ده د ټولو وزارتونو اودولتي ادارو د حقوقی چارو د کارکوونکو لپاره د دغو زده کړه ییزو برنامو جوړول دوام ومومي.