د کورونو د کرایي د کنټرول ګډې کمېټې په ټول هېواد کې د معاملاتو لارښوونې څهباندې ۱۰۰۰ دفترونه بررسي کړي دي
د کورونو د کرایې د کنټرول ګډې کمېټې د خپل فعالیت د پیل راهیسې په ټول هېواد کې د معاملاتو لارښوونې څهباندې زر (۱۰۰۰) دفترونه د کورونو د کرایې د کنټرول او له لوړیدو څخه یې د مخنیوي په تړاو، نظارت کړي دي.
یادې کمېټې د سږکال د وږي (سنبلې) د میاشتې په ۲۰مه نېټه د عدلیې وزارت په مشرۍ او اړوندو ادارو په غړیتوب په کار پیل کړی او په همدې موده کې په کابل او ولایتونو کې د بېلابېلو پلاوو په توظیف سره، د معاملاتو لارښوونې دفترونه نظارت کړي او ارزولي چې په پایله کې یې د معاملاتو لارښوونې ۴۶ دفترونه د سرغړونو له امله تړلي دي.
دې کمېټې په کابل کې د معاملاتو لارښوونې د ۶۳۲ دفترونو سربېره، ۲۱۴ استوګنیز بلاکونه هم په پلازمېنه کې د کرایې نرخ له اړخه بررسي او نظارت کړي او د کرایې له لوړیدو څخه یې د مخنیوي په برخه کې په لازمو اقداماتو لاس پورې کړی دی.
د یاد نظارت په ترڅ کې د فعالیت جوازونه، رسمي سټې او نور اړین سندونه بررسي شوي او د اصولو او قوانینو له مخې د کمېټې لخوا بېلابېل دفترونه تړل شوي دي.
کمېټې او موظفو ټیمونو د دفترونو ټولو متصديانو ته توصيه کړې چې د هغه کورونو له ثبتولو څخه ډډه وکړي چې د ۱۴۰۳ کال په پرتله یې د کرایې نرخ له لس سلنې لوړ شوی وي او خپل ټول معاملات په رسمي سټو کې ترسره کړي.
دغه راز، په ياده موده کې د کابل ښار په بېلابېلو ناحیو کې د هېوادوالو عریضو، تلفوني اړیکو او شکایتونو ته هم رسېدنه شوې ده. ډېری کرایهنیونکو د کرایې د لوړوالي په اړه خپلې ستونزې له کمېټو سره شریکې کړې دي چې د کمېټې او موظفو ټیمونو لهخوا ورته لازمې لارښوونې او قانوني مشورې ورکړل شوې دي.
د کورونو د کرایې د کنټرول ګډه کمېټه په مرکز کې د عدلیې وزارت په مشرۍ او په ولایتونو کې د عدلیې ریاستونو په مشرۍ په جدي ډول د کورونو د کرایې له قراردادونو څخه نظارت ترسره کوي او د کرایې د زیاتوالي یا د غیر رسمي قرارداد د مشاهدې په صورت کې به له سرغړونکو اشخاصو سره جدي چلند وکړي.
