د کنړ ولایت د ځمکو د غصب د مخنیوي د تخنیکي هیئت د ناستې جوړیدل
د کنړ ولایت د ځمکو د غصب د مخنیوي د تخنیکي هیئت ناسته د ذوالقعدې د میاشتې په ۱۰ نېټه د سه شنبې په ورځ د هیئت د رئیس او غړو په حضور سره جوړه شوه او هیئت ځینې ساحې هم بررسي کړې.
په دغې ناسته کې د تخنیکي هیئت رئیس کابل ته د سفر، د ځمکو د غصب د مخنیوي او د غصب شویو ځمکو د استرداد کمېسیون د رئیس لارښوونې او د تخنیکي هیئت بودجې په اړه معلومات وړاندې کړل.
په همدې توګه د کاري ساحو اړوند یو شمېر وړاندیزونه غونډې ته وړاندې او د تایید وړ وګرځیدل.
له غونډې څخه وروسته د تخنیکی هیئت ټیمونه د دغه ولایت د مرکز اړوند د لچګلي او ډنډو ساحو ته ولاړ او د ۸۶۴ کادسترې ټوټې سر نښتي شخصي ملکیتونه یې جلا کړل او د ۳۰۰ مترو په اوږدوالي سره يې حد فاصل نښاني کړ.
