د کنړ ولایت د عدلیې ریاست د اداري ناستې جوړیدل
د کنړ ولایت د عدلیې ریاست اداري ناسته، د محرم الحرام د مياشتې په ۱۸ مه نېټه چهار شنبې په ورځ د یاد ولایت د عدلیې رئیس مولوي روح الله روحاني او د یاد ریاست د آمرینو او کارمندانو په ګډون سره جوړه شوه.
په دغې ناسته کې، د کنړ ولایت د عدلیې رئیس د یاد ریاست کارمندانو ته د خپلو مسؤولیتونو د ترسره کولو، له نبوي سنتو سره سم د خپل سیرت او صورت برابرولو، وخت او حاضرۍ ته د پابندۍ، په وخت د چارو د اجرا، د اخلاص درلودلو، د کارمندانو تر منځ د متقابل احترام، له مراجعینو سره د ښه چلند او نورو مواردو په اړه لازمې توصیې وکړې.
په دغې ناسته کې د یاد ریاست آمرینو او کارمندانو هم خپلې ستونزې او د کاري چارو ښه والي په منظور وړاندیزونه مطرح کړل او هغو ته د رسیدګۍ غوښتونکي شول.
د عدلیې رئیس د یاد ریاست له کارمندانو سره ژمنه وکړه چې د هغوی د ستونزو د حل په برخه کې به له هیڅ ډول هلو ځلو څخه ډډه و نه کړي.
