د کابل ښار د زرګرانو اتحاديې رئیس د عدلیې وزارت تر نظارت لاندې د یوې غونډې په ترڅ کې تعيين شو

د کابل ښار د زرګرانو اتحادیې د رئیس تعیینولو په منظور د محرم الحرام د میاشتې په ۸ نېټه د یکشنبې په ورځ د عدلیې وزارت تر څارنې لاندې یوه غوڼده جوړه شوه. د یادې غونډې په ترڅ کې حاجي بشیر احسان‌زاده د یادې اتحادیې د رئیس په توګه تعیین شو.
په دې غونډه کې د عدليې وزارت مالي او اداري معين مولوي عبدالغني فايق، د ياد وزارت د انسجام رئیس مولوي عبدالصمد عمري، د استخباراتو رياست استازي، د کابل شهزاده سرای رئیس، د زرګرانو اتحادیې غړو او نورو اړوندو مسؤولینو ګډون درلود.
د عدليې وزارت مالي او اداري معين مولوي عبدالغني فايق په یاده غونډه کې د خبرو پر مهال وويل چې له دې وړاندې په کابل کې د زرګرانو ګڼو او وېشل شویو اتحادیو شتون درلود چې ډېرې ستونزې یې رامنځته کړې وې او ډېر کم پرمختګ یې درلود. د نوموړي په وینا، چې دغو ستونزو ته د رسیدګۍ په موخه د عدلیې وزارت د انسجام عمومي رياست د ۶ مياشتو  په ترڅ کې له ډېرو هلو ځلو وروسته د زرګرانو اتحادیې د نوي رئیس تعیین لپاره زمینه، برابره کړه.
مولوي عبدالغني فایق د کابل د زرګرانو له اتحاديې څخه وغوښتل چې له اسلامي امارت سره همکاره پاتې شي، د افغانستان په ابادۍ کې ونډه واخلي او افغان ولس ته خدمت وکړي.
همدارنګه په یاده غونډه کې د عدليې وزارت د انسجام عمومي رئيس مولوي عبدالصمد عمري هم خبرې وکړې او ویې ویل چې د زرګرانو اتحادیه یوه غیرامارتي، غیرسیاسي، غیر انتفاعي او خپلواکه اتحادیه ده. نوموړي ټینګار وکړ چې هیڅوک د یادې اتحادیې په چارو کې د مداخلې حق نه لري.
د عدلیې وزارت په هېواد کې د اتحادیو د ثبت او د هغو ستونزو ته د رسيدګۍ مسوؤليت په غاړه لري او په دوامداره توګه د هغو له فعالیتونو څخه نظارت ترسره کوي