د کابل ښار د دارالوکالو بررسي او نظارت
![.](/sites/default/files/2023-06/wklay_mdaf.jpg)
د عدليې وزارت د مدافع وکیلانو ریاست د نظارت هیئت د ذوالقعدې د میاشتې په لومړۍ او دیارلسمې نېټو په کابل ښار کې له ۳۲ دارالوکالو څخه نظارت او بررسي ترسره کړه. د دغې بررسۍ په پایله کې د کابل ښار په دوه یمې ناحیې کې د مدافع وکیلانو د کړنلارې ۵۳ مادې نه رعایتولو په دلیل یوه دارالوکاله وتړل شوه او متصدي يې عدليې وزارت ته وغوښتل شو.
دغه هیئت د هغو دارالوکالو له ټولګې څخه چې د دغه هیئت له خوا وړاندې تړل شوې وې، یوازې د هغوی څلورو تنو ته چې خپل دفترونه يې د مدافع وکیلانو د انسجام کړنلارې مطابق تنظیم او سرغړونې یې حل کړې وې، د کتبي ژمنلیک اخیستلو څخه وروسته بیاځل د فعالیت اجازه ورکړه.
د مدافع وکیلانو ریاست د اسلامي شریعت حکمونو او د افغانستان د اسلامي امارت د نافذ شویو قوانینو په رڼا کې د مدافع وکیلانو څخه د ملاتړ په لټه کې دی او دغې برخه کې له هیڅ راز همکارۍ څخه ډډه نه کوي.