د کابل ولایت د قره باغ ولسوالۍ له مقاماتو سره د همغږۍ ناسته جوړیدل
د عدليې وزارت د حقوقي مرستو رئیس مولوي حافظ عبدالصمد عمري او له هغه سره مل پلاوي د ذوالقعدې میاشتې په ۴ نېټه د چهارشنبې په ورځ د یاد ریاست د حقوقي مرستندویانو او عامه حقوقي پوهاوي ورکوونې د کاري ستونزو د حل په منظور د کابل ولایت د قره باغ ولسوالۍ له مقاماتو سره د همغږۍ ناسته جوړه کړه.
په دغې ناسته کې، د قره باغ ولسوال مولانا عبدالجمیل، امنیه قوماندان او د دغې ولسوالۍ نورو سیمه ییزو مسوولینو ګډون کړی وو.
په دغې ناسته کې، د حقوقي مرستو رئیس، د حقوقي مرستو او د عامه حقوقي پوهاوي ورکوونې برخه کې د عدلیې وزارت کاري برنامې بیان کړې او د دغې ولسوالۍ له اړوندو ادارو سره یې د حقوقي مرستندویانو موجودې ستونزې مطرح کړې. نوموړي د دغې ولسوالۍ د امنیتي چارو مسؤلینو ته وویل چې د شکمن او تورن حقوق د نیولو، بندي کولو او څېړنې په وخت کې رعایت کړئ.
د قره باغ ولسوال د حقوقي مرستو د رئیس او د هغه د مل پلاوي له ورتګ څخه هرکلی وکړ او ښه راغلاست یې ورته وویل او حقوقي مرستې او د حقوقي پوهاوي ورکول یې د ټولنې له اړینو اړتیاو څخه وبلل. نوموړي په یادې ولسوالۍ کې د دغو برنامو د پلي کولو برخه کې د هر اړخیزې همکارۍ ژمنه وکړه.
