د ځمکو له غصب څخه د مخنیوي کمېسیون په بېلابېلو ولایتونو کې د زرګونو جریبو ځمکو په اړه لازم تصمیم ونیو
![.](/sites/default/files/2024-07/awl_1.jpg)
د ځمکو له غصب څخه د مخنیوي او د غصب شویو ځمکو د استرداد کمېسیون ناسته د محرم الحرام د میاشتې په ۱۵ نېټه د یکشنبې په ورځ د عدلیې وزارت سرپرست او د یاد کمېسیون رئیس، شیخ الحدیث مولوي عبدالحکیم شرعي په مشرۍ د عدلیې وزارت په مقر کې جوړه شوه.
په دې ناسته کې، د کرنې، اوبو لګولو او مالدارۍ وزارت سرپرست مولوي عطاء الله عمري، د کور او ښار جوړلو وزارت سرپرست مولوي حمدالله نعماني، د سرحدونو، قومونو او قبایلو وزارت معین مولوي محمد اسماعیل غزنوي، د چارو د ادارې عمومي رئیس شیخ الحدیث مولوي نور الحق انور ، د کابل زون د غصب شویو امارتي ځمکو قضیو ته د رسیدګۍ اختصاصي محکمې رئیس مولوي محمد انور مدثر، د سترې محکمې استازي شیخ عبدالصمد حقاني، د امارت د قضایاوو عمومي رئیس او د یاد کمېسیون سکرتر مولوي احسان الله وثیق او نور مسؤولینو ګډون درلود.
په دې ناسته کې د ځمکو له غصب څخه د مخنیوي کمېسیون په کابل، ننګرهار، خوست، نیمروز، لغمان، جوزجان، کندز او میدان وردک ولایتونو کې د زرګونو جریبو ځمکو موضوعات او دوسیې بررسۍ لاندې ونیولې.
په یاده ناسته کې په کابل او ننګرهار کې د ځینو ښارګوټو، مهاجرینو لپاره د سرپناه تعیینولو موضوع او په کابل، خوست، لغمان، جوزجان، میدان وردګ او کندز ولایتونو کې د ځینو امارتي ځمکو موضوعاتو په اړه هر اړخیز بحث ترسره شو.
کمېسیون پرېکړه وکړه چې د هېواد په بېلابېلو ولایتونو کې پر امارتي تثبیت شویو ځمکو باندې لازم پړاونو ترسره شي او هغه دوسیې هم چې زیاتې بررسۍ ایجابوي، بشپړې شي.