د ځمکو له غصب څخه د مخنیوي کمېسیون رهبرۍ د غصب شوو ځمکو پر چټکو اجراآتو ټینګار وکړ
د ځمکو له غصب څخه د مخنیوي کمېسیون رهبرۍ په یوې ناسته کې چې د عدلیې وزیر او د یاد کمېسیون رئیس، محترم شیخ الحدیث مولوي عبدالحکیم شرعي په مشرۍ او د دغه کمېسیون د نورو غړو په ګډون ترسره شوه د عالیقدر امیرالمؤمنین حفظه الله تعالی د فرمان مطابق د غصب شوو ځمکو پر چټکو اجراآتو ټینګار وکړ.
په دې ناسته کې چې د جمادي الثاني د میاشتې په ۲۳ مه نېټه د چهارشنبې په ورځ د عدلیې وزارت په مقر کې ترسره شوه، د کرنې، اوبو لګولو او مالدارۍ وزیر محترم مولوي عطاءالله عمري، د کور او ښار جوړلو وزیر محترم مولوي حمدالله نعماني، د سرحدونو، قومونو او قبایلو وزارت معین محترم مولوي محمد اسماعیل غزنوي، د چارو ادارې عمومي رئیس محترم شیخ الحدیث مولوي نورالحق انور، د سترې محکمې استازی محترم شیخ عبدالصمد حقاني، د کرنې وزارت د اراضۍ رئيس محترم مولوي محمود مظلوم او د هېواد د څلورو زونونو د اختصاصي محکمو قاضیانو او رئیسانو او نورو مسؤولینو ګډون درلود.
په یاده ناسته کې د عالیقدر امیرالمؤمنین حفظه الله تعالی د هدایت پر تطبیق ټینګار وشو چې وایي: « په هرځای کې چې د خلکو کورونه پر مغصوبه ځمکه باندې وي او دا هم ثابته وي چې دا ځمکه د غصب ده پر هغه ځمکه ژر تر ژره اجراآت وکړئ.»
همدارنګه د ځمکو له غصب څخه د مخنیوي کمېسیون د رهبرۍ په ناسته کې پر غصب شوو ځمکو د کمېسیون د پرېکړو پر تطبیق او په امارتي ځمکو کې له نویو تصرفاتو څخه د مخنیوي په اړه بحث وشو او په هکله یې لازم تصامیم ونیول شول.
په کندهار ولایت کې د ځمکو د غصب اړوند یو شمېر دوسیې هم په یاده ناسته کې تر بحث او بررسۍ لاندې ونیول شوې او پرېکړه وشوه چې یو پلاوی دې کندهار ولایت ته سفر وکړي او موضوعات دې بررسي کړي، راپور يې کمېسیون ته وړاندې کړي.
