د ځمکو له غصب څخه د مخنیوي او د غصب شویو ځمکو د استرداد کمېسیون د رهبرۍ ناسته جوړیدل
د ځمکو له غصب څخه د مخنیوي کمېسیون رهبرۍ د عدلیې وزیر، د کمېسیون رئیس او د اراضۍ او د امارتي ځمکو د استرداد وزارت وارسي کوونکي محترم شیخ الحدیث مولوي عبدالحکیم شرعي په مشرۍ د یوې ناستې په ترڅ کې په هلمند او لوګر ولایتونو کې د نږدې ۱۳ زره او ۵۰۰ جریبو ځمکو موضوعات تر بحث او بررسۍ لاندې ونیول او په هکله یې لازمې پرېکړې وکړې.
په دې ناسته کې چې د ربیع الاول د میاشتې په ۴مه نېټه د پنجشنبې په ورځ د عدلیې وزارت په مقر کې ترسره شوه، د کرنې، اوبو لګولو او مالدارۍ وزیر محترم مولوي عطاءالله عمري، د کور او ښار جوړلو وزیر محترم مولوي نجیب الله حقاني، د سرحدونو، قومونو او قبایلو وزارت معین محترم مولوي محمد اسماعیل غزنوي، د چارو ادارې عمومي رئیس محترم شیخ الحدیث مولوي نورالحق انور، محترم مولوي محمد حماد د سترې محکمې استازي، د کرنې وزارت د اراضۍ رئیس محترم مولوي محمود مظلوم، د امارت د قضایاوو عمومي رئیس او د کمېسیون سکرتر محترم مولوي احسان الله وثیق او نورو مسؤولینو ګډون درلود.
د ځمکو له غصب څخه د مخنیوي کمېسیون رهبرۍ د هلمند ولایت د مرکز لښکرګاه ښار په پنجاب قلعې ساحه کې د معلمینو د ښارګوټي ۱۴۰۰ جریبه ځمکې، د لوګر ولایت د څرخ ولسوالۍ په آبجوش کلي کې د څه باندې ۱۲ زرو ۴۴ جریبه ځمکې موضوعات، د کمېسیون او اختصاصي محکمې د پرېکړو د تطبیق طرزالعمل او یو شمېر نور مهم موضوعات تر بحث او بررسۍ لاندې ونیول.
د کمېسیون رهبرۍ په هلمند ولایت کې د ۱۴۰۰ جریبه ځمکې په تړاو د امارتي توب پرېکړه وکړه او د لوګر ولایت د څرخ ولسوالۍ په آبجوش کلي کې د څه باندې ۱۲ زره جریبه ځمکې د دوسیې په هکله یې پرېکړه وکړه چې د یادې ځمکې زیاته برخه امارتي ده او ځینې برخې یې عامه تاسیساتو لپاره هم سروې شوي چې دا برخې دې اړوندو امارتي ادارو ته تسلیم کړل شي او امارتي ځمکې یې د ځمکو په بانک کې ثبت شي.
همداراز په دې ناسته کې د کمېسیون اړوند نورو موضوعاتو په اړه لازم تصامیم ونیول شول.
