د ځمکو د منازعاتو د حل لپاره کمیسیون د لومړنۍ ناستې جوړېدل
د ځمکو د منازعاتو د حل لپاره کمیسیون لومړنۍ ناسته د ۱۴۰۱ د وري په ۱۰ مه د چهارشنبې په ورځ، د افغانستان اسلامي امارت د عدلیې وزارت سرپرست شیخ الحدیث مولوي صاحب عبدالحکیم شرعی په مشرۍ جوړه شوه.
په دې ناسته کې د کمېسیون نورو غړیو هر یو د ښارجوړولو او ځمکو وزارت سرپرست مولوي حمدالله نعماني، د لوی څارنوالۍ سرپرست مولوي شمس الدین پهلوان، د ستري محکمې د دارالانشاء رئیس مفتی عبدالرشید سعید، د کرنې او اوبو لګولو او مالدارۍ وزارت سرپرست مولوي عبدالرحمن راشد، د کار او ټولنیزو چارو وزارت سرپرست ملا عبدالولي څارنوال او د اسلامي امارت د چارو د ادارې د انسجام مرستیال شیخ نورالحق انور ګډون درلود.
د ځمکو د منازعاتو د حل لپاره د کمیسیون غړیو له عامه ملکیتونو او دولتي ځمکو له غصب څخه د مخنیوي د قانون او کړنلارې په اړه بحث وکړ او خپل نظرونه یې تبادله کړل.
همداراز په دې ناسته کې پرېکړه وشوه تر څو د ځمکو د منازعاتو د حل لپاره یوه جامع طرحه برابره او د افغانستان اسلامي امارت د مشرتابه مقام ته د منظورۍ لپاره وړاندې شي.
د ځمکو د منازعاتو د حل لپاره کمیسیون د عالیقدر امیرالموْمنین د لارښوونې پربنسټ د کابینې په فوق العاده ناسته کې چې په قندهار ولایت کې جوړه شوې وه د افغانستان اسلامي امارت د عدلیې وزارت سرپرست شیخ الحدیث مولوي صاحب عبدالحکیم شرعي په مشرۍ او د اړوندو ادارو په غړیتوب رامنځته شوی تر څو له دولتي ځمکو څخه د غصب مخینوی او د ځمکو د شخړو د حل لپاره اقدام وکړي.