د پکتیکا ولایت عدليې ریاست ددغه ولایت ۲۵ تنه د عریضې لیکوونکې ارزیابي کړل
د پکتیکا ولایت عدليې ریاست د جمادي الثاني میاشت په ۱۲ نېټه د پنجشنبه په ورځ د آزموینې په جوړولو سره د یاد ولایت ۲۵ تنه د عریضې لیکوونکي ارزیابي کړل او د سمې عریضې لیکنې برخه کې، لازمې توصیې او لارښوونې وکړې.
دغې برنامه کې چې په عدليې ریاست کې جوړه شوې وه، د یاد ولایت د عدلیې رییس الحاج مولوي حیات الله امین د موضوع په اړه خبرې وکړې، ويې ویل چې دغه ولایت کې د یاد ریاست لخوا ۵۰ تنو د عریضې لیکوونکو ته د فعالیت جواز ورکړل شوي چې د هغوی له ۲۵ تنو څخه په مرکز کې آزموینه واخیستل شوه.
نوموړي زیاته کړه، هغو کسانو ته چې دغې آزموینه کې بریالي شي، د فعالیت جواز به ورکړل شي او هغه اشخاص چې دغې آزموینه کې بریالي نشي، مخکنی جواز به یې واخیستل شي او نور به دغې برخه کې د فعالیت اجاز ورنکړل شي.
دغه راز د عدليې رییس وویل چې یو شمېر عریضه لیکوونکي چې په غیر قانوني دول يې سپینې عریضې پلورلې وې، د هغوی جوازونه واخیستل شول او که چېري راتلونکي کې څوک پر دغه عمل ونیول شي، له هغو سره به قانوني چلند وشي.
پاتې دې نه وي چې له ۲۵ تنو نورو عریضه لیکوونکو څخه به دغه ولایت کې ډیر ژر آزموینه واخیستل شي.
