د پکتیا ولایت د عدلیې رئيس د ځاځي اریوب ولسوالۍ له مسؤولينو سره وکتل
د پکتیا ولايت د عدلیې رئيس مولوي فاتح الله فاتح او له هغه سره مل پلاوي، د یاد ولایت د ځاځي اریوب ولسوالۍ ته سفر وکړ او د یادې ولسوالۍ له ولسوال مولوي رحمت ولي حميدي او نورو سیمه ییزو مسؤولينو سره وکتل.
د دې کتنې په ترڅ کې د پکتیا ولایت د عدلیې رئيس د یو شمېر موضوعاتو په اړه خبرې وکړې او د ځمکو له غصب څخه د مخنيوي په برخه کې یې په لا زیاتې همغږۍ ټينګار وکړ.
نوموړي د امارت د قضایاو د مدیریتونو، د حقوقي مساعدینو، مدافع وکیلانو، خیریه بنسټونو، د معاملاتو لارښوونې او عریضه لیکونکو په برخو کې ستونزې د یادۍ ولسوالۍ له ولسوال او سیمه ییزو مسؤولینو سره شریکې کړې چې هغوی د دغو ستونزو د حل کولو ډاډ ورکړ.
همدارنګه په دې سفر کې د عدلیې رئيس د ځاځي اریوب ولسوالۍ د امارت د قضاياو له عمومي مديریت څخه هم ليدنه وکړه، د هغوی ستونزې یې له نږدې واورېدې.
د عدلیې رئیس د یادې ولسوالي د امارت د قضاياو عمومي مديريت ستونزو ته د رسيدګي په برخه کې ډاډ ورکړ او زياته یې کړه چې عدلیې رياست تل له دوی سره همکاري کوي.
د پکتیا ولایت د عدلیې رياست د ښې همغږۍ، د شته ستونزو د لرې کولو او د کاري خنډونو لهمنځه وړلو په موخه د یاد ولایت د نورو ولسوالیو له مسؤولینو سره هم د همغږۍ ناستې جوړوي.
