د پکتیا ولایت د عدليې ریاست د کارکوونکو میاشتنۍ ناسته جوړه شوه
د پکتیا ولایت د عدليې ریاست د کارکوونکو میاشتنۍ ناسته د صفر المظفر په ۲۲ نېټه د یکشنبې په ورځ د یاد ولایت د عدليې رییس مولوي محمد رییس محمدي په مشرۍ جوړه شوه.
په دغې ناسته کې، چې د عدليې ریاست د کنفرانسونو په تالار کې جوړه شوې وه، د بېلابېلو برخو آمرینو، مدیرانو او د یاد ریاست ټولو مرکزي کارکوونکو ګډون کړی وو.
د پکتیا عدليې رییس په دغې ناسته کې د تېرې میاشتې د لاسته راوړنو، راتلونکي پلان او د دغه ریاست د ستونزو په اړه خبرې وکړې او د دغه ریاست کارکوونکو ته يې له اسلامي شریعت او محمدي (صل الله علیه وسلم) سنت سره سم د کارکوونکو صورت او سیرت د برابرولو په اړه د عدليې وزیر پیغام ابلاغ کړ او پر عملي کولو يې ټینګار وکړ.
په دغې ناسته کې د عدليې رییس د یاد ریاست کارکوونکو ته وویل چې د عریضې لیکونکو، د معاملو د لارښوونو او د موټر پلورونکو کنترول د انسجام مدیریت مسوولیت دی او باید هغوی کنترول کړي. هغه د ولسوالیو د حقوقو مدیرانو ته لارښوونه وکړه چې د رسمي عریضه لیکونکو نوملړ ځان سره ولرئ او د هغو عریضو په اړه اجراآت و نه کړئ چې د نورو لخوا لیکل شوې وي او هغه عریضې مسترد کړئ چې د عریضې لیکوونکي شهرت په کې نه وي ذکر شوی.
هغه زیاته کړه مخکې له اجراآتو څخه باید عریضه په ځیرتیا سره وکتل شي چې د عارض او معروض علیه شهرت، د مدعابها په املاکي عریضه کې، د ځای موقیعت، مساحت ... او په دیوني عریضو کې د دین اندازه، د دین وجیبه او نورې ځانګړتیاوې په کې ذکر شوې وي که نه نو، عریضه د اصلاح په غرض مسترده شي.
د عدليې رییس وویل حقوقي عریضې نباید له ۱۵ ورځو څخه زیات د حقوقو په مدیریتونو کې دوام ومومي او که چېرې دواړه لورو پر مصالحې قناعت نه درلود د شرعي حل او فصل په غرض موضوع دې محکمې ته راجع شي. هغه زیاته کړه چې جریمې د اسلامي امارت د مشرتابه د مقام د حکم پر اساس جواز نه لري او له هغو څخه دې ډډه وشي.
د عدليې رییس د هغو عریضو په اړه چې څو معروض علیه ولري او په بېلابېلو ولایتونو او ولسوالیو کې ژوند کوي، د دعوا دواړه لورو تر مینځ د مصالحې، د هغو عریضو چې معروض علیه یې له افغانستان څخه بهر ژوند کوي، له معروض علیه څخه د ضمانت اخیستلو او د نورو برخو په اړه مسوولینو ته لارښوونه وکړه.
همدا راز د عدليې رییس وویل چې د امارتي او عامه ملکیتونو اړونده عریضې د امارت د قضایاو آمریت ته راجع شي. هغه د یاد ریاست کارکوونکو ته د چارو د ښه انسجام او د اونیزو، میاشتنيو، ربعوارو او کلني ګزارشونو د چمتو کولو، وخت او حاضرۍ ته د پابندۍ او پر خپل وخت د کارونو سرته رسولو په اړه لازمې لارښوونې وکړې.
