د پکتیا ولایت د خیریه بنسټونو او د معاملاتو د لارښوونې دفترونو له مسؤلینو سره د یاد ولایت د عدلیې رئیس کتنه
د پکتیا ولایت د عدلیې رئیس مولوي محمد رییس محمدي د ربیع الثاني د میاشتې په ۲۱ نېټې د یکشنبې په ورځ د یاد ولایت د خیریه بنسټونو او د معاملاتو د لارښوونې دفترونو له مسؤلینو سره د عدلیې ریاست په مقر کې وکتل او خبرې وکړې.
په دغې ناسته کې چې له ګاونډویو هیوادونو څخه له راستنو شویو مهاجرینو سره د خیریه بنسټونو او د معاملاتو د لارښوونو د دفترونو مسؤلینو د مرستو او همکاریو ترلاسه کولو او د هغوی ستونزو ته د رسیدګۍ په منظور جوړه شوې وه، د پکتیا ولایت د عدلیې رئیس د موضوع په تړاو خبرې وکړې ویې ویل چې له پاکستان څخه ایستل شوي مهاجرین زموږ او تاسو مرستې او همکارۍ ته اړتیا لري او له هغوی سره مرسته زموږ ګډه وجیبه ده. نوموړي په دغه ولایت کې د خیریه بنسټونو او د معاملاتو د لارښوونو له مسؤلینو څخه وغوښتل چې په دغې برخه کې خپله اسلامي او ملي وجیبه ادا کړي.
د یاد ولایت د خیریه بنسټونو او د معاملاتو د لارښوونو د دفترونو مسؤلینو ژمنه وکړه چې مهاجرینو لپاره د کورونو د خرڅلاو، ګروۍ او کرايې لګښتونو په کمولو او هغوی لپاره د لازمو آسانتیاو رامنځته کولو په برخه کې به له خپلې وسې سره سم هڅې وکړي.
