د پروان ولایت د موټر پلورونکو ترمنځ د شخړې د حل په منظور یاد ولایت ته د عدليې وزارت د پلاوي سفر
د عدليې وزارت د مقام د لارښوونې په اساس، د دغه وزارت د ټولنو او د ټولنیزو چارو د رئیس مولوي محمد یاسین حقاني په مشرۍ یو پلاوی د پروان ولایت د موټر پلورونکو د اتحاديې د رئیس د ټاکلو په تړاو د یاد ولایت د موټر پلورونکو ترمنځ د شخړې د بررسۍ او حل په منظور، د صفرالمظفر د میاشتې په ۲۵ نېټې د دوشنبې په ورځ پروان ولایت ته روان شو.
یاد هیئت لومړی د پروان ولایت د عدلیې له رئیس مولوي عبدالقدیر او د یاد ریاست له کارمندانو سره وکتل او د موټر پلورونکو په دوسیې کې موجود سندونه او د یادې اتحادیې د نوماندانو سوابق بررسي کړل.
وروسته یاد هیئت د موټر پلورونکو ساحې ته ولاړ او له هر موټر پلورونکي سره یې په جلا جلا ډول وکتل او له هغوی څخه یې د استعلام په ذریعه معلومات وغوښتل.
دغه راز موظف پلاوي د یاد ولایت له والي، د امنیې له قوماندان او د استخباراتو له رئیس سره وکتل او د یادې موضوع د حل په منظور یې له هغوی سره مشوره وکړه.
د پروان ولایت والي او یادو مسؤلینو دغه پلاوي ته د ښه راغلاست ویلو ترڅنګ د یادې شوې شخړې د حل په برخه کې د هر ډول همکارۍ ډاډ ورکړ.
په پایله کې، د عدلیې وزارت د مؤظف شوي پلاوي له بررسیو او د دواړو لورو او د پروان ولایت د موټر پلورونکو د اتحاديې د غړو له موافقې او مشورې څخه وروسته د یاد شوي پلاوي تر څارنې لاندې د دغې اتحادیې رئیس، مرستیال، منشي او بنسټ اېښودونکي تعیین شول.
