د نیمروز ولایت د عدلیې او ګمرک رياستونو ترمنځ د همغږۍ ناسته جوړه شوه
د نیمروز ولایت د عدلیې ریاست او ګمرک رياست ترمنځ د همغږۍ ناسته د ربیعالاول د مياشتې په ۶ مه نېټه د دوشنبې په ورځ، د دواړه ریاستونو د رئیسانو او نور مسؤولینو په ګډون سره د نیمروز ولایت د ګمرک رياست په مقر کې جوړه شوه.
په دې ناسته کې د نیمروز ولایت د عدلیې رئیس مولوي عبدالوارث خليل د دواړو رياستونو ترمنځ د ورته همغږۍ ناستو په جوړېدو ټينګار وکړ او زياته يې کړه چې د عامه شتمنيو څخه د ساتنې او ملاتړ په موخه د ورته ناستو جوړېدل اړين دي.
همدارنګه، په دې ناسته کې ګمرک رئيس مولوي عبدالحليم شمس الحق اخند د مالي مقروضينو په اړه معلومات وړاندې کړل او زياته یې کړه له هغوی سره به د شریعت او اسلامي امارت د اصولو مطابق چلند وشي تر څو د بیت المال له حیف او ميل کېدو څخه مخنیوی وشي.
