د ننګرهار د ۲۱ ولسوالیو د امارت د قضایاوو د عمومي مدیرانو د همغږۍ ناسته جوړیدل
د ننګرهار ولایت د عدلیې ریاست د ننګرهار په ۲۱ ولسوالیو کې د یاد ریاست د امارت د قضایاو د عمومي مدیرانو ترمنځ د پېژندګلوۍ او همغږۍ په منظور، یوه ناسته جوړه کړه.
په دې ناسته کې چې د رجب المرجب د میاشتې په ۱۸ نېټه د سه شنبې په ورځ د عدلیې ریاست په مقر کې جوړه شوه، د عدلیې رئیس مولوي فاتح الله فاتح او د یاد ریاست نورو مسؤولینو خبرې وکړې او خپلو مسوؤلیتونو ته يې د یادو مدیرانو په توجو ټینګار وکړ.
د ننګرهار د عدلیې رئیس د امارت د قضایاوو له عمومي مدیرانو څخه وغوښتل چې تقوا، اخلاص او ښه اخلاق غوره کړي او د اړوندو ولسوالیو له نورو مسؤولینو سره هم، بشپړه همکاري ولري.
د عدلیې ریاست د مدافع وکیلانو آمر هم په یاده ناسته کې د دندو په امانت دارۍ ټینګار وکړ او ویې ویل چې باید دندې ته د یو امانت په حیث وکتل شي او له مراجعینو سره هم ښه چلند وشي.
په یاده ناسته کې د بهسود ولسوالۍ د امارت د قضایاوو عمومي مدیر د نورو په استازیتوب خبرې وکړې او ډاډ یې ورکړ چې د مسؤولیتونو په مخ وړلو کې به له احتیاط او تقوا څخه کار واخلي او کارونه به د قوانینو او اصولو مطابق پر مخ یوسي. په یاده ناسته کې یو لړ ستونزې هم مطرح شوې او د عدلیې رئیس ډاډ ورکړ چې د یادو ستونزو د حل په برخه کې به هلې ځلې وکړي.
