د میدان وردک ولایت د ابتداییه محکمې له رئیس سره د یاد ولایت د عدلیې رئیس کتنه
د میدان وردک ولایت د عدليې رئیس مولوي مطیع الحق عثمان د ربیع الاول د میاشتې په ۱۸ نېټې د سه شنبې په ورځ د یاد ولایت د ابتداییه محکمې له رئیس مولوي موسی کلیم عاصم او د دغې محکمې د جزا د دیوان مفتي سره د عدليې ریاست په مقر کې وکتل او خبرې ورسره وکړې.
په دغې ناسته کې د عدلیې ریاست د حقوقي مساعدتونو آمر او د یاد ریاست حقوقي مساعد هم حضور درلود او د سترې محکمې د ۴۵ ګڼې متحدالمال، د عدليې ریاست له لوري بې وزله تورنو لپاره د حقوقي مساعد د تعیین، په جزايي قضیو کې د حقوقي مساعد د دندو او واکونو، د هغو شمېر تورونو د برخلیک تعیین چې د هغوی د حق العبد مدعی محکمې ته نه حاضریږي او د نورو موضوعاتو په اړه په کې بحث او خبرې وشوې او د دغو دوو ادارو ترمنځ په لازیاتې همغږۍ ټینګار وشو.
په ورته مهال د میدان وردک ولایت د ځمکو د غصب د مخنیوي د تخنیکي هیئت غړو هم د یاد ولایت د استیناف محکمې له رئیس او غړو سره وکتل او د دغه هیئت ستونزې له هغوی سره شریکې کړې.
په دغې ناسته کې د ځمکو د غصب اړوند د یو شمېر دوسیې په اړه بحث وشو او په دغې برخه کې لازم تصمیمونه ونیول شول او د محکمو او تخنیکي هیئت ترمنځ په لازیاتې همغږۍ ټینګار وشو.
