د لغمان او پکتیا ولایت د تخنیکي هیئتونو د ناستو جوړیدل
د لغمان او د پکتیا ولایتونو د ځمکې د غصب د مخنیوي د تخنیکي هیئتونو ناستې ددغو هیئتونو د رییسانو او غړو په حضور سره جوړې شوې او یادو ولایتونو کې د یو شمېر غصب شوو ځمکو په اړه بحث او د نظر تبادله وشوه. دغه راز یادو هیئتونو په دغو ولایتونو کې د ځمکې د غصب د مخنیوي په اړه هم یو لړ لازم تصامیم ونیول شوو.
د پکتیا ولایت د تخنیکي هیئت په ناسته کې د راتلونکې ورځ له پاره پلان جوړ او پکښې پریکړه وشوه چې د غصب شوو ځمکو د تشخیص او تثبیت مخکني کمېسیون ته استعلام ورکړل شي ترڅو خپل ترلاسه شوي سندونه د ځمکې د غصب د مخنیوي تخنیکي هیئت ته وسپاري.
په همدې حال کې، د لغمان ولایت د تخنیکي هیئت په ناسته کې د R2 ساحې په صنعتي پارک کې د ۲۹۲ جریبه غصب شوې ځمکې په اړه بحث وشو او یو ټیم موظف شو ترڅو د غاصبینو شهرت او د غصب شوو کورونو شمېر مشخص کړي.
یاد شوي هیئت ددغې ساحې له څو تنو غاصبینو سره هم کتلي او له هغوی څخه يې سندونه غوښتي. هغوی هیڅ ډول سندونه نه درلودل او هیئت هغوی ته لارښوونه وکړه ترڅو ساحه ژر تر ژره تخلیه کړي.
هغوی خپل ستونزې له هیئت سره شریکې کړې او حاضر شوو چې د خپل په تصرف کې د ځمکو قیمت ورکړي. یاد شوي هیئت ژمنه وکړه چې د هغوی ستونزه به له مشرانو سره شریکه کړي.
دغه هیئت د زنګوري د ۸۶ جریبه کرنیزې ځمکې په اړه هم پریکړه وکړه چې غاصب او مدعی شخص ولسوالۍ ته جلب شي او له هغه څخه ضمانت واخیستل شي چې پریادې ځمکې بې ځایه دعوا نه کوي او د اجاره دار د کښت او کار مخنیوي و نه کړي.
