د غزني ولایت د عدلیې رياست او یو شمېر مدافع وکیلانو ترمنځ د همغږۍ ناسته ترسره شوه
د غزني ولایت د عدلیې رياست، د ربیعالآخر د مياشتې په ۷مه نېټه د سهشنبې په ورځ د غزني ولایت له یو شمېر مدافع وکیلانو سره د عدلیې ریاست په مقر کې د همغږۍ ناسته ترسره کړه.
په دې ناسته کې د عدلیې رياست یو شمېر نورو مسؤولينو هم ګډون درلود او د عدلیې رئيس په کې ټينګار وکړ چې مدافع وکيلان دې په خپلو کاري چارو کې دقت وکړي او له خلکو، مراجعینو او مؤکلینو سره اخلاص او نيک چلند وکړي.
د غزني ولایت د عدلیې رئیس له مدافع وکيلانو څخه غوښتنه وکړه چې د خپلو مؤکلینو له حقوقو څخه په مسلکي، اغیزمن او قانوني ډول دفاع وکړي او له هر ډول غیر قانوني او غیر مسلکي چلند څخه ځان وساتي.
په یاده ناسته کې مدافع وکیلانو هم له مسؤولینو سره خپلې ستونزې، وړاندیزونه او نظرونه شریک کړل چې د عدلیې ریاست مسئولینو یې د حل په موخه ډاډ ورکړ.
