د عدلیې وزارت د مرکزي رئیسانو ناسته جوړه شوه
د اسلامي امارت د عدلیې وزارت د مرکزي رئیسانو ناسته د روان هجري قمري کال د ذوالحجې د میاشتې په ۶، سه شنبې په ورځ د دې وزرات سرپرست شیخ الحدیث مولوي عبدالحکیم شرعي صاحب په مشرۍ جوړه شوه.
په دې غونډه کې د هیواد په جنوبي ولایتونو د وروستۍ زلزلې په باره کې خبرې وشوې او د عدلیې وزیر د دې وزارت د انسجام رئیس ته لارښوونه وکړه چې د خیریه بنسټونو له مسئولینو سره و ګوري او له هغوی څخه دې وغواړي چې د کورونو جوړولو او د اوبو د څاګانو کیندلو په ګډون د بنسټیزو کارونو کې دې د هیواد زلزله ځپلو خلکو سره مرسته وکړي.
دغه راز په دې غونډه کې د عدلیې وزرات د اړتیا وړ تېلو د قرارداد په اړه خبرې وشوې. د عدلیې وزیر اړوندو مسؤولینو ته لارښوونه وکړه چې د تېلو د قرار داد کار دې ډیر ژر بشپړ کړي. هغه د دې وزارت رئیسانو ته توصیه وکړه چې خپلو کاروته دې پاملرنه وکړي او هغه دې په ټاکلي وخت ترسره کړي.
شیخ صاحب ټینګار وکړ چې د بی نظمۍ د مخنیوي په منظور دې باید ټول کارکوونکي خپل غرمنۍ ډوډۍ د وزارت په داخل کې وخوري ځکه چې له وزارت څخه بهر ته د خوړلو له پاره د کارکوونکو وتل په اداره کې د ګډوډۍ رامنځ ته کېدو سبب ګرځي.
په دې غونډه کې په دې وزارت کې د دیني درسونو په اړه هم خبرې وشوې او پریکړه وشوه چې له عدلیې وزارت څخه بهر طالبان هم کولای شي په دغو درسونو کې ګډون وکړي. دغه راز پریکړه وشوه چې د هغو طالبانو له پاره دی کارتونه جوړ کړی شي.
په پای کې د عدلیې وزیر د دې وزارت د بشري سرچینو رئیس، اداري او مالي رئیس او د حقوقو رئیس ته لارښوونه وکړه چې د ولایتونو د عدلیې په ریاستونو کې د اجیرانو د کمبود ستونزې ته رسیدګي وکړي.
