د عدلیې وزارت د قانون جوړونې عمومي رئیس د روسیې سفارت له مرستیال سره د افغانستان او یاد هېواد ترمنځ د هوکړه لیکونو په اړه خبرې وکړې
د عدلیې وزارت د قانون جوړونې عمومي رئیس فضلهادي صاحبزاده په افغانستان کې د روسیې د سفیر له مرستیال ښاغلي افګني امیګروف او د هغه له مل پلاوي سره وکتل او دواړو لورو له افغانستان سره د روسیې هېواد د هوکړه لیکونو په اړه چې مخکي لاسلیک شوي، خبرې وکړې.
په دې کتنه کې چې د روژې د میاشتې په ۲۲ نېټه د دوشنبې په ورځ د یاد وزارت په مقر کې ترسره شوه، د روسیې سفارت مرستیال او له هغه سره مل پلاوي دواړو هېوادونو ترمنځ د هغو هوکړه لیکونو د اعتبار په اړه چې مخکې عقد شوي او د هغو د اړوندو مواردو په اړه معلومات وغوښتل.
د عدلیې وزارت د قانون جوړونې عمومي رئیس یاد پلاوي ته وویل چې د افغانستان اسلامي امارت د شریعت اصولو او خپلې پالیسي مطابق د روسیې په شمول د نړۍ له ټولو هېوادونو سره ښې اړیکې غواړي او زموږ هڅه همدا ده چې له ټولو هېوادونو سره ښې اړیکې ولرو.
نوموړي له هېوادونو سره د افغانستان د هغو هوکړه لیکونو او تړونونو په اړه چې مخکنۍ اداره کې عقد شوي، وویل چې زموږ اصول دا دي چې هوکړه لیکونه باید له شریعت او زموږ ملي ګټو سره په ټکر کې نه وي. له همدې امله اړینه ده چې مخکني هوکړه لیکونه د بهرنیو چارو وزارت سره شریک شي او د بهرنیو چارو وزارت یې له اصولو سره سم د عدلیې وزارت ته استوي او د عدلیې وزارت د هوکړه لیکونو متن ته په کتو سره، خپل نظریات د بهرنیو چارو وزارت سره شریکوي.
نوموړي زیاته کړه چې د همدې بهیر په ترڅ کې، د بهرنیو چارو وزارت له لارې لسګونه هوکړه لیکونه د عدلیې وزارت سره شریک شوي او د یاد وزارت علماوو کرامو او قانون پوهانو د هغو په تړاو خپل نظریات وړاندې کړي دي.
