د عدلیې وزارت د رهبري شورا ناسته جوړیدل
د عدلیې وزارت د رهبري شورا ناسته د شوال د مياشتې په ۲۲ مه نېټه د چهارشنبې په ورځ د عدلیې وزارت د مسلکي معین شیخ الحدیث مولوي عبدالکریم حیدر په مشرۍ او د عدلیې وزارت د اداري معین مولوي عبدالغني فایق او مرکزي رئیسانو په ګډون سره جوړه شوه.
په دغې ناسته کې په مرکز او لایتونو کې د یاد وزارت د حقوقي مساعدینو او د انسجام ادارې د مسؤولینو په اداري چارو کې شته ستونزې او نور اداري موضوعات بحث او بررسۍ لاندې ونیول شوو.
په یاده ناسته کې پریکړه وشوه چې د حقوقي مساعدینو د ستونزو لرې کولو او د هغوی د وکالت جواز د تمدید پړاوونو تېرولو څرنګوالي په موخه، اړوند ریاستونه مناسبې حل لارې ولټوي او راتلونکې ناستې ته یې وړاندې کړي.
دغه راز د عدلیې وزارت رهبري شورا په ولایتونو کې د انسجام د مسؤولینو د اداري ستونزو لرې کولو په تړاو اړوندو ریاستونو ته لازمې لارښوونې وکړې.
