د عدلیې وزارت د داخلي پلټنې ریاست د ۲ تشو بستونو د رقابتي آزموینې اخیستل
د اسلامي امارت د عدلیې وزارت د بشري سرچینو ریاست د ربیع الثاني میاشتې په ۲۳ نېټې د سه شنبې په ورځ د یاد وزارت د داخلي پلټنې د ریاست د ۲ تشو مسلکي بستونو رقابتي آزموینه د آزادې سیالې له لارې واخیسته.
په دغې آزموینه کې چې د عدليې وزارت په مقر کې واخیستل شوه، د عدلیې وزارت اداري معین مولوي عبدالغني فایق او د بشري سرچینو رئیس مولوي رحمت الله حلیم او د یاد وزارت نورو مسؤلینو حضور درلود او د آزموینې له بهیر څخه یې نظارت ترسره کړ.
د آزموینې په پيل کې د عدلیې وزارت د بشري سرچینو رئیس د آزموینې د ډول او د پوښتنو د څرنګوالي په اړه معلومات ورکړل او برخه اخیستونکو ته یې د آزموینې پروسې له بشپړې روڼتیا څخه ډاډ ورکړ.
دغې آزموینې کې د ګډون لپاره ۱۱۰ تنو فورمې اخیستې وې چې له دغې جملې څخه د هغوی ۱۰۱ تنه په شرایطو برابر پېژندل شوي او له هغوی څخه ۸۳ تنو په آزموینې کې برخه واخیسته او د یادو بستونو ترلاسه کولو لپاره یې په خپلو کې رقابت وکړ.
