د عدلیې وزارت د حقوقي مرستو ریاست او د ميدان وردګ ولایت د والي ترمنځ د همغږۍ ناسته جوړیدل
د عدلیې وزارت د حقوقي مرستو رئيس مولوي جان محمد «محمد طلحه» او ورسره مل پلاوي، د ربیعالاول د مياشتې په ۲۳مه نېټه د سهشنبې په ورځ د ميدان وردګ له والي مولوی خیرالله خيرخواه او د دغه ولایت نورو مسؤولینو سره د همغږۍ ناسته ترسره کړه.
په دي ناسته کې چې دمیدان وردګ ولایت د مقام په مقر کې ترسره شوه، د عدلیې وزارت د حقوقي مرستو رئيس د وړيا حقوقي مرستو او مشورو د وړاندې کولو څرنګوالي، حقوقي مرستو ته د بيوزلو زیانمنو، تورنو او شکمنو د لاسرسۍ او یو شمېر نورو موضوعاتو په اړه خبرې وکړې او مسؤولينو سره یې لازم معلومات شریک کړل.
په دې ناسته کې د ميدان وردګ ولایت والي او نورو مسؤولينو ډاد ورکړ چې د حقوقي مرستو د ترلاسه کولو په موخه د عدلیې وزارت د حقوقي مرستو رياست ته د بيوزلو زیانمنو، تورنو او شکمنو کسانو ورپېژندلو او حقوقي مساعدینو سره په قضايي ناستو کې د ګډون او د مؤکلينو دوسیو کې لازمه همکاري وکړي.
