د عدلیې وزارت د حقوقي مرستو ریاست او د زندانونو د چارو د تنظیم ادارې د عدلي او قضايي ارګانونو د همغږۍ ریاست ترمنځ د همغږۍ ناسته جوړېدل
د عدلیې وزارت د حقوقي مرستو رئيس، مولوي جان محمد "محمد طلحه" او د زندانونو د چارو د تنظيم د عدلي او قضایي ارګانونو د همغږۍ رئيس، مولوي عبدالله حقیق تر منځ د همغږۍ ناسته د محرم الحرام د مياشتې په ۱۸ مه نېټه د دوشنبې په ورځ د یادې ادارې په مقر کې جوړه شوه.
په دې ناسته کې چې د لا زياتې همغږۍ رامنځته کولو په موخه جوړه شوې وه، د حقوقي مرستو وړاندې کولو او د وړیا حقوقي مشورو وړاندې کولو د څرنګوالي، په جزائي او فاميلي قضیو کې حقوقي مرستو ته د بندیانو لاسرسی او بندیانو لپاره د حقوقي پوهاوي د برنامو پلي کولو موضوعاتو په اړه بحث او خبرې وشوې.
د عدلیې وزارت د حقوقي مرستو رئیس په دې ناسته کې د یاد ریاست مسؤولیتونه توضیح کړل او ویې ویل چې یاد ریاست په جزايي قضیو کې ټولو بېوزلو شکمنو او تورنو او په کورنیو قضیو کې بې وزلو ښځو او ماشومانو لپاره وړیا حقوقي مرستې او مشورې وړاندې کوي.
په یاده ناسته کې د زندانونو د چارو د تنظیم ادارې مسؤولينو د ورته ناستو له جوړېدو او د عدلیې وزارت د حقوقي مرستو رياست له فعاليتونو څخه خوښي څرګنده کړه او د همکارۍ ډاډ یې ورکړ. هغوی زياته یې کړه چې دغه اداره به د حقوقي مرستو له ریاست سره د حقوقي پوهاوي ورکولو برنامو په پلي کولو او په ورته نورو برخو کې لازمه همکاري وکړي.
د عدلیې وزارت د حقوقي مرستو رياست او ولایتي آمریتونه یې د هېواد په کچه، د بېوزله محکوم علیه یا تورن او شکمن لپاره د حقوقي مرستې وړاندې کولو او په کورنیو قضیو کې د بېوزلو ښځو او ماشومانو، مجني علیه حقوقو او نور آسیب پذیره قشرونو څخه د دفاع په برخه کې فعاليت ترسره کوي.
