د عدلیې وزارت او اړوندو ادارو ترمنځ د همغږی ناسته
د افغانستان اسلامي امارت د عدلیې وزارت د بشر حقونو د ملاتړ ریاست، د عدلیې وزارت او اړوندو ادارو ترمنځ د همغږي په موخه ناسته جوړه کړه.
دغه ناسته، د سه شنبې ورځ د ۱۴۰۰هـ.ل کال د حوت ۱۰، د عدلیې وزارت د بشر حقونو ملاتړ رییس مولوي شکرالله شاکر صاحب په ریاست او د اړوندو وزارتونو او ادارو د استازیو په ګډون په عدلیې وزارت کې جوړه شوې وه.
په دغه ناسته کې، د عدلیې وزارت د بشر حقونو د ملاتړ رییس، د شریعت او د اسلام مقدس دین له نظره د بشر حقونو په اړه وینا وکړه، ویویل چې د اسلام سپېڅلي دین له ۱۴۰۰ کالو را پدېخوا د بشر له حقونو څخه تر ټولو ډېر ملاتړ کړی او هغو ته درناوی لري. هغه وویل چې د اسلامي شریعت پر مبنی د بشر له حقونو څخه ملاتړ او مراعتول یې د هېواد د ټولو اتباعو مکلفیت دی او د افغانستان اسلامي امارت د شریعت او د اسلام سپېڅلې دین پر مبنی تل د بشر له حقونو څخه ملاتړ کړی دی.
په دغه ناسته کې، د ملګرو ملتونو سپارښتنې، بین المللي میثاقونه او کنوانسیونونو په اړه بحث او د نظرونو تبادله وشوه. پرېکړه وشوه، چې د افغانستان اسلامي امارت کابینې ته وړاندیز شي چې د علماؤ، حقوقپوهانو او د پوهنتون له استادانو څخه عالي کمیسیون جوړ شي ترڅو د ملګرو ملتونو سپارښتنې، بین المللي میثاقونه او کنوانسیونونه د شریعت او د اسلام سپېڅلي دین له نظره وارزوي. او په هغه صورت کې چې دغه کمیسیون د شریعت او د اسلام سپېڅلي دین سره په ټکر کې موارد تشخیص کړي، د هغې لپاره واردمخه شرط و ټاکي او له اړوندو مراجعو سره یې شریک کړي.
