د عدليې وزير د ناروې د سفارت له شارژدافیر سره وکتل او خبرې وکړې
د اسلامي امارت د عدليې وزير، محترم شيخ الحديث مولوي عبدالحکيم شرعي افغانستان لپاره د ناروې د سفارت شارژدافیر، ښاغلي في البرت ایلساس او له مل پلاوي سره وکتل او د کورنيو قوانينو، نړيوالو حقوقو او نورو موضوعاتو په اړه یې خبرې وکړې.
دا کتنه نن سهشنبې، د ذیالحجې په ۲۰مه نېټه د عدليې وزارت په مقر کې ترسره شوه او د عدليې وزارت او د ناروې سفارت يو شمېر نورو مسؤولينو هم پهکې ګډون درلود.
په دې کتنه کې د عدليې وزير وویل چې د اسلامي امارت په واکمنۍ او د امريکايي اشغال له پایته رسېدو سره، الحمدلله په افغانستان کې د امن فضا رامنځته شوې او په هېواد کې هېڅ امنيتي ستونزه وجود نهلري. هغه زیاته کړه چې په تېرو نږدې څلورو کلونو کې په ټولو برخو کې په ځانګړي ډول د قوانينو په برخه کې ډېر پرمختګونه شوي دي.
هغه زیاته کړه چې د اسلامي امارت د عدليې وزارت فرعي قوانين له قرآن کريم، نبوي سنتو او د حنفي فقهې له معتبرو سرچينو څخه تخریج کوي او پر دغو قوانينو ۹۵ سلنه کار په عدلیې وزارت کې بشپړ شوی دی. نوموړي وویل چې علماء کرام او حقوق پوهان پر قوانينو کار کوي او دا قوانین د عالیقدر اميرالمؤمنين حفظه الله تعالی تر دقيقې کتنې وروسته د هغه لخوا توشيح او نافذ کېږي.
افغانستان لپاره د ناروې د سفارت شارژدافیر، ښاغلي في البرت ایلساس په دې کتنه کې پر قوانینو د عدليې وزارت د کار له چټکتيا او په دې برخه کې د پام وړ پرمختګ ستاينه وکړه. هغه وويل، له افغانستان سره اړيکې د ناروې د لومړيتوبونو له جملې څخه دي او د هغه د هېواد د دولت هڅه دا ده چې خپلې اړيکې له اسلامي امارت سره وساتي او پياوړې کړي.
