د عدليې وزارت د ټولنیزو چارو معینې د بدخشان ولایت د عدليې ریاست او د هغه نورې برخې وکتلې
د افغانستان اسلامي جمهوریت د عدليې وزارت د ټولنیزو چارو معینې ډاکترې ذکيې عادلي له خپل ملګري هیئت سره د ولایتي سفرونو په لړ کې دا ځلې د بدخشان ولایت ته سفر وکړ او د کړنو او د بررسۍ او ارزړنې په مقصد يې د دغه ولایت د عدليې ریاست، د اطفالو د اصلاح او روزنې مرکز او د دغه مرکز د نوې ودانۍ د جوړولو کار وکوت.
دغه راز د عدليې وزارت معینې په هغې غونډه کې چې د بدخشان د والي د مرستیال او د دولتي ادارو د رئیسانو او مسؤلینو په شتون د دغه ولایت په مقر کې جوړه شوې وه د اړوندو ادارو او د عدليې ریاست ترمنځ په همکارۍ او همغږۍ باندې ټینګار وکړ او په دې برخه کې يې د جدي اقداماتو غوښتنه وکړه.
هغې دغه راز د ټولنیزو بنسټونو د مسؤلینو په شتون یوه غونډه کې د ټولنیزو بنسټونو د فعالیتونو د سازمان ورکولو لپاره د عدليې وزارت د اقداماتو په باره کې خبرې وکړې او ويې ویل: د ټولنیزو بنسټونو د ملي پالېسۍ په تدوین سره به د فعالیت د جواز د اخیستلو، د ټولنو او شوراګانو د فعالیت د ډول او د مسؤلانه رپوټ ورکولو او ځواب ورکولو د څرنګوالي په برخو کې شته ستونزې ترزیاتې اندازې پورې لرې شي.
