د عدليې وزارت استول شي هیئت د بغلان ریاست له عدلیې ریاست څخه لیدنه وکړه
د عدليې وزارت استول شوی هیئت د ددغه وزارت د حقوقي مساعدتونو رییس مولوي رحمت الله حقاني په مشرۍ د شمال ولایتونو د عدليې ریاستونو د بررسۍ په منظور سفر کړی، چې د ربیع الثاني میاشت په ۱۳ نېټه د سه شنبې په ورځ بغلان ولایت ته ورسید او ددغه ولایت د عدليې ریاست کړنې یې بررسي کړې.
دغه هیئت چې په ترکیب کې یې مالي او اداري رییس او د عدليې وزارت د مرکزي ریاستونو استازي شامل دي د عدلیې رییس مولي ګل رسول نصرت او ددغه ریاست له امرینو او کارکوونکو سره وکتل. مولوي رحمت الله حقاني په دغې کتنه کې د تېرو ۲۰ کلونو د انقلاب شهیدانو له پاره دعا وکړه او د مجاهیدینو د فدارکاریو او د سرښندنو ستاینه وکړه او د اسلامي نظام، ازادۍ او استقلال ته یې اشاره وکړه.
دغه راز د عدلیې ریاست له ټولو دفترونو څخه یې لیدنه وکړه او کارکوونکو ته يې په کار کې د صداقت او له نبوي سنتو سره سم خپل سیرت او صورت عیارولو په اړه توصیه وکړه او د هغوی ستونزې يې واوریدې.
دغه راز د هیئت رییس او دوه تنو غړو د عدليې ریاست له لیدنې څخه وروسته د بغلان والي له مرستیال ملا احمد مبارک سره وکتل او خبرې وکړې. په دغې کتنه کې ښاروال، د محکمې رییس، د استخباراتو رییس، د کرنې رییس او د سیمه ییزو ادارو یو شمېر نورو مسوولینو حضور درلود.
یاد هیئت له عدلیې ریاست سره د ولایت د مقام او د سیمه ییزو ادارو مسوولینو له همغږۍ او همکارۍ څخه قدر داني وکړه او ددغو همکاریو د پياوړتیا غوښتنه یې وکړه. په دغې ناسته کې د عدلیې رییس هم اړونده ستونزې بیان کړې او له اړوندو مسوولینو څخه یې د همکاریو غوښتنه وکړه.
په دغې ناسته کې د بغلان د والي مرستیال سیمه ییزو ادارو ته لارښوونه وکړه چې له عدليې ریاست سره لا زیاته همکاري وکړي.
