د زابل ولایت عدلیې رئيس د شينکۍ ولسوالۍ له مسؤولينو سره وکتل
د زابل ولايت عدلیې رئيس مولوي محمد یعقوب عاصم او له هغه سره مل پلاوي د ربیع الثاني د مياشتې په ۲۶ مه نېټه د سه شنبې په ورځ، د یاد ولایت شينکۍ ولسوالۍ ته سفر وکړ او د یادې ولسوالۍ له ولسوال او یو شمېر سیمه ییزو مسؤولينو سره یې وکتل.
د يادې کتنې په ترڅ کې د زابل ولایت عدلیې رئيس د یو شمېر اړوندو موضوعاتو په اړه خبرې وکړې او د ځمکو له غصب څخه د مخنيوي په برخه کې یې په لا زياتې همغږۍ ټينګار وکړ.
نوموړي د دغې ولسوالۍ د امارت د قضایاو د عمومي مديریت په برخه کې ستونزې د یادې ولسوالۍ له ولسوال او سیمه ییزو مسؤولینو سره شریکې کړې او هغوی د دغو ستونزو د لرې کولو په برخه کې د عدلیې رئیس ته ډاډ ورکړ.
همدارنګه د عدلیې رئیس د یادې ولسوالۍ د امارت قضایاو مدیریت څخه کتنه وکړه او د چارو د ښه والي په موخه یې مسؤولینو ته لازمې توصیي وکړې.
