د دفاع وکالت څلورمې دورې لپاره د ورودي ازموینې د نوم لیکنې بهیر د تمدید په اړه د عدلیې وزارت خبرتیا
د دفاع وکالت د جوازلیک ټولو محترمو غوښتونکو ته خبر ورکول کېږي چې، د دفاع وکالت په څلورمې دورې کې د ورودي ازموینې لپاره د نوم لیکنې بهیر د ۱۴۰۳ هجري شمسي کال د سلواغې د میاشتې ۲۰ نېټې پورې چې د ۱۴۴۶ هجري قمري کال د شعبان د میاشتې له ۹ نېټې سره سمون لري، تمدید شوی دی.
دغه راز هغو محترم متقاضیانو ته چې په ولایتونو کې اوسیږي خبر ورکول کېږي چې د نوم لیکنې لپاره مرکز ته له مراجعې څخه مخکې، له خپلو سندونو (د تابعیت تذکره او تحصیلي سندونه) سره د خپلو ولایتونو د عدلیې ریاستونو ته مراجعه وکړي ترڅو د خپل شرایطو له برابروالي څخه ډاډ ترلاسه کړي او په شرایطو د نهبرابروالي په صورت کې، د هغوی له سرګردانۍ څخه مخنیوی وشي.
محترم غوښتونکي له دې موضوع د ډاد له ترلاسه کولو څخه وروسته کولای شي کابل ته سفر وکړي او نوم لیکنې لپاره اقدام وکړي.
د یادونې وړ ده چې د غوښتونکو نهايي نوملړ او د ازموینې نېټه د نوم لیکنې له بهیر څخه وروسته اعلانیږي.
د دفاع وکالت په ورودي ازموینه کې د نوم لیکنې شرایط دې ازموینې لپاره د نوم لیکنې د پیل په اړه د عدلیې وزارت په مخکنۍ خبرتیا کې مشخص شوي دي.
